Sverð umturnast í þvottabursta
valinn „Einkennilegasti bókartitillinn“ í Þýskalandi árið 2010.
Á bókasýningunni í Frankfurt fór fram hin árlega samkeppni um „einkennilegasta bókartitilinn“ á þýskum bókamarkaði. Í þetta skiptið hreppti bókin 10 ráð til að hætta að drepa og byrja að vaska upp (Zehn Tipps, das Morden zu beenden und den Abwasch zu beginnen), eftir Hallgrím Helgason, verðlaunin eftirsóttu.
Eins og greint var frá hér á síðunni fyrir skömmu þá atti þar þýsk þýðing bókarinnar kappi við 19 aðra undarlega titla um tignarheitið. Sex titlar voru sigtaðir út í netkosningu áður en þriggja manna dómnefnd skar úr um hvaða titill bar af, og valdi hún að lokum bók Hallgríms.
Í úrskurði dómnefndarinnar sagði: „Titillinn tileinkar sér orðfæri vinsællar bókmenntagreinar, sjálfshjálparbókarinnar, en tengir það svo óvænt við húshald og friðarstefnu og stingur þar með mállegu prilblómstri í byssukjaftinn. Sverð umturnast í þvottabursta!“
Bókin hefur notið töluverðra vinsælda í Þýskalandi, hjá gagnrýnendum og lesendum, og er hún nú á þriðja upplagi sínu þar. Hér má sjá myndskeið um verðlaunin (á þýsku).
Og meira af Hallgrími. Ljóð eftir hann birtist nýverið á vefmiðlinum Youtube. Það er á ensku og ber titilinn „Suit & Tie“. Fjallar ljóðið um „eftir-hruns“ Ísland, þar sem snyrtilegir menn í jakkafötum vekja skelfingu meðal fólks, og var fyrst flutt á ljóðahátíð í Stavangri í fyrra. Nú má nálgast upplesturinn á Youtube síðu Hallgríms.