Níunda Bókmenntahátíðin í Reykjavík
Vikuna 6. – 12. september 2009 gefst Reykvíkingum kostur á að hlýða á upplestra, viðtöl og pallborðsumræður með íslenskum og erlendum rithöfundum.
Bókmenntahátíðin í Reykjavík er nú haldin í 9. sinn, en fyrsta hátíðin var haldin árið 1985 og að undanförnu hefur hún verið haldin annað hvert ár. Venju samkvæmt verður hátíðin í ár vettvangur innlendra og erlendra rithöfunda sem kynna verk sín og segja frá lífi sínu og störfum í formi upplestra, viðtala og pallborðsumræðna. Í stjórn Bókmenntahátíðarinnar sitja meðal annarra rithöfundarnir Sjón, Einar Kárason og Thor Vilhjálmsson, en formaður hennar er Sigurður Valgeirsson. Áhersla er lögð á að gefa íslenskum lesendum tækifæri til að kynnast erlendum höfundum, en líka á að styrkja sambönd höfunda og þýðenda innbyrðis.
Bókmenntahátíðin er öllum opin og aðgangur er ókeypis. Frá 6. – 12. september verða upplestrar í Norrænahúsinu og Iðnó. Í ár kynna meðal annars Steinar Bragi og Yrsa Sigurðardóttir verk sín. Meðal erlendra höfunda má nefna íranska rithöfundinn Kader Adbolah og verðlaunahafann Luis López Nieves frá Púertó Rico og lesa þeir báðir úr verkum sínum. Þekktasti höfundur hátíðarinnar er eflaust Michael Ondaatje, sem skrifaði bókina „The English Patient“ sem náði miklum vinsældum. Hann kemur hér í hópi kanadískra ljóðskálda.
Hátíðinni lýkur á laugardaginn með útgefendamálþingi þar sem þemað er „Bókaútgáfa á 21. öld“ og ljóðadagskrá sem stendur allan eftirmiðdaginn.
Frekari upplýsingar um hátíðina og dagskrá hennar er að finna á www.bokmenntahatid.is