Bókasýningin í London
Earls Court iðaði af lífi dagana 8. – 10. apríl á meðan Bókasýningin í London stóð yfir. Líkt og í fyrra, leiddu Norðurlöndin saman hesta sína og stóðu að sameiginlegum bás á Bókasýningunni í London í ár.
Miðstöð íslenskra bókmennta og Félag íslenskra bókaútgefenda tóku þátt í Bókasýningunni í London sem haldin var dagana 8. – 10. apríl.
Samnorrænn sýningarbás
Líkt og í fyrra, leiddu Norðurlöndin saman hesta sína og stóðu að sameiginlegum bás á Bókasýningunni í London í ár. Auk Miðstöðvar íslenskra bókmennta, voru þar norrænu bókmenntakynningarstofurnar Norla í Noregi, Fili í Finnlandi, Farlit í Færeyjum, Swedish Arts Council/Statens Kulturrad í Svíþjóð og The Danish Arts Council í Danmörku.
Í kynningarstarfinu í London var lögð sérstök áhersla á nýjan lista Miðstöð íslenskra bókmennta yfir 20 bækur sem komu út árið 2013. Sambærilegur listi yfir bækur 2012 var gerður í fyrra og er hann að finna hér.
Fjöldi spennandi viðburða í Earls Court
Sýnendur á Earls Court, sem er sýningarsvæði Bókasýningarinnar í London, eru um 1500 talsins frá öllum heimshornum og um 25.000 fagaðilar á bókasviði sækja sýninguna á ári hverju.
Fjöldi ráðstefna, fyrirlestra og pallborðsumræða er haldinn í tengslum við sýninguna og í ár stóðu Norðurlöndin sameiginlega að umræðum um norrænar bókmenntir og bókamarkað sem kallaðist "Beyond Nordic Noir - An Overview of the Nordic Literary Market". Þar töluðu Susanne Bergström-Larsen, framkvæmdastýra sænsku bókmenntakynningarstofunnar, Kristenn Einarsson, framkvæmdastjóri félags bókaútgefenda í Noregi og Boyd Tonkin rithöfundur og blaðamaður hjá The Independent. Umræðuefnið var norrænar bókmenntir, sem á undanförnum árum hafa fengið það orð á sig að vera eingöngu glæpasögur. Staðreyndin er hins vegar önnur því norrænar fagurbókmenntir, skáldsögur og bækur almenns efnis er einnig að finna á "long" og "short" listum virtra alþjóðlegra bókmenntaverðlauna. Nýleg dæmi þar um eru verk Auðar Övu Ólafsdóttur og Jóns Kalmans Stefánssonar á "longlista" bókmenntaverðlauna enska dagblaðsins The Independent fyrir bestu erlendu skáldsöguna - The Independent Foreign Fiction Prize - eins og greint var frá í fjölmiðlum. Tilkynnt var um hvaða verk urðu fyrir valinu á "stuttlista" verðlaunanna á bókasýningunni í London.