Hundruð erlendra rithöfunda sóttu Reykjavík heim í síðustu viku
Vikuna 8. – 15. september var mikil bókmenntaveisla í Reykjavík sem hófst með heimsþingi PEN og lauk með Bókmenntahátíð í Reykjavík síðastliðinn sunnudag.
Vikuna 8. – 15. september var mikil bókmenntaveisla í Reykjavík sem hófst með heimsþingi PEN og lauk með Bókmenntahátíð í Reykjavík síðastliðinn sunnudag.
Þetta var í ellefta sinn sem Bókmenntahátíð í Reykjavík var haldin, en í fyrsta sinn sem heimsþing PEN er haldið á Íslandi. Hundruð rithöfunda og blaðamanna frá öllum heimshornum sóttu Reykjavík heim í tilefni heimsþings PEN en ráðstefnan var haldin í Hörpu.
Bókmenntahátíð í Reykjavík var sett formlega miðvikudaginn 11. september og að venju var boðið á hátíðina hópi alþjóðlegra rithöfundar auk erlendra útgefenda, umboðsmanna og blaðamanna.
Meðal erlendra höfunda á hátíðinni í ár voru Antonio Skármeta (Chile), Douglas Coupland (Kanada), Can Xui (Kína), Madeline Miller (Bandaríkjunum) og Kjell Espmark (Svíþjóð).
Bókmenntahátíð í Reykjavík í samstarfi við Miðstöð íslenskra bókmennta og Reykjavík Bókmenntaborg UNESCO buðu hópi blaðamanna, útgefenda og umboðsmanna höfunda frá Frakklandi, Ítalíu, Bretlandi, Bandaríkjunum og Danmörku á hátíðina. Hátíðin var sérlega vel sótt og þótti takast vel.