Ljóðlistarverkefnið ORT: Ljóð frá Íslandi/Ljóð frá Póllandi
Verkefnið nær yfir fjórar árstíðir og mun ljóðlistin ferðast milli Póllands og Íslands í allri sinni fjölbreytni á þessu tímabili: á pappír, á vefnum, á götum, í strætisvögnum og neðanjarðarlestum. Ljóð verða flutt í útvarpi og á bókmenntahátíðum og viðburðum, þau munu ganga inn í bókasöfn, skóla og leikskóla og prýða götur Reykjavíkur og borga í Póllandi.
Ljóðið fær vængi
Hugsjón ORT er að leyfa ljóðinu að takast á loft af síðunni og finna sér leið inn í opinber og óvænt rými. Verkefninu er ætlað að opna fyrir samræður milli skálda og listamanna þjóðanna beggja í gegnum viðburði, þýðingar og vinnusmiðjur – og þar með byggja brú milli eyjunnar og meginlandsins. Aldrei fyrr hefur verið ráðist í jafn víðfeðma kynningu á íslenskri ljóðlist í Póllandi og pólskri ljóðlist á Ísland, en yfir 20 skáld frá Póllandi og Íslandi munu taka þátt í verkefninu.
Opnunarhátíðin í Kraká - Smekkleysukvöld
Vorútgáfa verkefnisins hefst, sem fyrr segir, á Miłosz hátíðinni í Kraká, með þátttöku Braga Ólafssonar, Óskars Árna Óskarsson og Sjóns. Skáldin þrjú munu lesa upp verk sín á endurvöktu Smekkleysukvöldi, þar sem tónlistarmennirnir Sigtryggur Baldursson og Ásgerður Júníusdóttir auk hljómsveitanna Ghostigital og Captain Fufanu koma einnig fram. Á meðan kvöldinu stendur verður ljósmyndum sem Ólafur J. Engilbertsson hefur tekið saman um sögu Smekkleysu varpað upp á tjald. Viðburðurinn á að blása nýju lífi í hugmyndina um listrænt samstarf, sjálfsprottna tilraunagleði og umfram allt tefla saman lifandi flutningi ljóða og tóna. Með þessu er hugmyndin að baki Orðið tónlist, fjölljóðahátíð sem Smekkleysa hefur áður staðið fyrir, endurvakin.
Samstarfsaðilar
Bakhjarl verkefnisins ORT er Bókmenntamiðstöð Póllands og er það styrkt af Evrópusjóðnum „Promotion of Diversity in Culture and Arts within European Cultural Heritage“. Samstarfsaðilar á Íslandi eru Miðstöð íslenskra bókmennta, Reykjavík Bókmenntaborg UNESCO, ÚTON og Norræna húsið. Ríkisútvarp Póllands er sérstakur velunnari verkefnisins. Á meðal aðila sem koma að skipulagningu viðburða eru Viðburðadeild Kraká (Kraká Festival Office), Bókmenntahátíðin í Sopot, Spoke'n'Word hátíðin í Varsjá, Reykjavík Bókmenntaborg UNESCO og Borgarbókasafn Reykjavíkur.