Jón Kalman í Ítalíu
„Á Ítalíu er ástríða fyrir bókmenntum,“ segir rithöfundurinn Jón Kalman Stefánsson sem er nýlentur eftir að hafa tekið þátt í Bókmenntahátíðinni í Mantova á Ítalíu þar sem hann var á meðal hundrað annarra höfunda.
„Á Ítalíu er ástríða fyrir bókmenntum,“ segir rithöfundurinn Jón Kalman Stefánsson sem er nýlentur eftir að hafa tekið þátt í Bókmenntahátíðinni í Mantova á Ítalíu þar sem hann var á meðal hundrað annarra höfunda. „Ítölum finnst að bókmenntirnar eigi að skipta máli, og ég fann sannarlega fyrir því í Mantova. Ég var í höfundaspjalli fyrir hádegi einn daginn og það komu meira en 300 manns að hlusta á mig.“
Bók Jóns Kalmans, Harmur englanna kom út hjá ítalska forlaginu Iperborea á dögunum en þeir gefa út fleiri íslenska höfunda, til dæmis Hrafnhildi Hagalín Guðmundsdóttur, Thor Vilhjálmsson, Einar Má Guðmundsson og Halldór Laxness. Í tilefni útgáfunnar fór Jón Kalman til Ítalíu þar sem hann, auk þess að taka þátt í Bókmenntahátíðinni í Mantova, kom líka fram í Genoa og í Como og fór í fjölda viðtala við útvarp og dagblöð. „Þetta er gríðarlega flott forlag“ segir Jón Kalman, „ég var eins og blómi í eggi því þau stjönuðu við mig á allan hátt.“
„Bókmenntahátíðin í Mantova er alveg sérstök“ bætir Jón Kalman við, „Það eru ekki allir Ítalir sem lesa bókmenntir, en þeir sem lesa, lesa mjög mikið. Það endurspeglaðist á hátíðinni sem var eiginlega eins og hátíð lesenda. Fólk flykktist til borgarinnar, sem hefur álíka íbúafjölda og Reykjavík, hvaðanæva að á Ítalíu og fyllti alla sali þar sem höfundar lásu og spjölluðu. Þetta var frábær upplifun og lífið verður betra þegar maður fær að taka þátt í svona hátíðum.“