Gyrðir tilnefndur til Jean Monnet-verðlaunanna í Frakklandi
Í vikunni var tilkynnt hvaða höfundar hljóta tilnefningu til Jean Monnet bókmenntaverðlaunanna í Frakklandi.
Í vikunni var tilkynnt hvaða höfundar hljóta tilnefningu til Jean Monnet bókmenntaverðlaunanna í Frakklandi. Verðlaunin heita á frönsku le Prix Jean-Monnet de Littératures Européennes og hljóta tíu höfundar tilnefningu. Tilnefnd verk eru ýmist skrifuð eða þýdd á frönsku.
Gyrðir Elíasson er tilnefndur fyrir smásagnasafnið Milli trjánna sem kom út í franskri þýðingu Robert Guillemette hjá Books Éditions nú í byrjun apríl. Meðal annarra höfunda sem eru tilnefndir til verðlaunanna í ár má nefna hina þýsku Judith Hermann, Julian Barnes frá Bretlandi og Patrick Chamoiseau frá Martíník. Verðlaunin verða afhent á evrópskri bókmenntahátíð sem fram fer í Cognac í Frakklandi dagana 15.-18. nóvember. Verðlaunin hafa verið veitt síðan 1995 og meðal fyrri verðlaunahafa eru höfundar á borð við Hans Magnus Enzensberger, J. G. Ballard og Jorge Semprún.
Bækur Gyrðis njóta mikillar velgengni í þýðingum þessi dægrin. Skemmst er að minnast Bókmenntaverðlauna Norðurlandaráðs árið 2011 sem hann hlaut fyrir sömu bók, Milli trjánna, en hún hefur nú komið út í Danmörku, Svíþjóð og Noregi, auk Frakklands, og hlotið afbragðsdóma. Þá hafa bækur Gyrðis, Gangandi íkorni og Sandárbókin, nýlega komið út á þýsku og hlotið mikið lof gagnrýnenda og lesenda.
Frétt um verðlaunin í frönskum miðlum má nálgast hér.