Heiðursskálinn verðlaunaður
Heiðursskáli Íslands á Bókasýningunni í Frankfurt viðburður ársins á Lúðrahátíð ÍMARK.
Föstudagskvöldið 24. febrúar 2012 voru íslensku auglýsingaverðlaunin afhent á Lúðrahátíð ÍMARK. Heiðursskáli Íslands á Bókasýningunni í Frankfurt 2011 hlaut þar Lúður sem viðburður ársins, en hann var unninn í samstarfi við auglýsingastofuna Fíton og Sagafilm.
Í heiðursskálanum gafst gestum Bókasýningarinnar tækifæri til að kynnast Íslandi sem landi bókmennta sem og stórbrotinnar náttúru. Þar gaf að líta myndbandsportrett, vörpuð á gríðarstór sýningartjöld, af 25 Íslendingum sem lásu upp úr eftirlætisbókum sínum. Í skálanum var að auki að finna vandaða 360 gráða kvikmyndarinnsetningu sem sýndi stórbrotið landslag og náttúrufyrirbæri Íslands með áhrifaríkum hætti. Samhliða kynningu á bókmenningu og náttúru Íslands skapaðist afslappað andrúmsloft þar sem gestir gátu hlýtt á tónlist, gluggað í bækur og notið veitinga í séríslenskri setustofu.
Mikill fjöldi gesta sótti íslenska skálann á meðan bókasýningunni stóð. Þýskir fjölmiðlar sýndu sömuleiðis framlagi Íslands einkar mikinn áhuga, en kynning Íslands vakti athygli víðar í Evrópu þar sem fjöldi blaðagreina birtist að auki í frönskum, ítölskum, belgískum og spænskum dagblöðum og tímaritum.