„Hvenær komið þið aftur?“
Síðasti blaðamannafundur Sögueyjunnar á Bókasýningunni fór fram 15. október.
„Við erum afar stolt af mótttökunum sem kynning okkar hefur fengið,“ sagði Halldór Guðmundsson, verkefnisstjóri Sögueyjunnar, á síðasta blaðamannafundi verkefnisins á Bókasýningunni í Frankfurt 2011. „Viðbrögðin hafa verið yfirþyrmandi og farið langt fram úr okkar bestu vonum.“
Jürgen Boos, framkvæmdarstjóri Bókasýningarinnar, var á sama máli. „Ísland hefur sýnt fram á að sagnalist er ómissandi þáttur af lífinu. Yfir 200 nýútgefnar þýðingar eru til marks um það að þýskur almenningur og útgefendur taka íslenskum bókmenntum opnum örmum. Nú, þegar viðburðaríku heiðursári Íslands í Frankfurt fer senn að ljúka, brennur aðeins ein spurning á vörum mínum: Hvenær komið þið aftur?“
Kristján B. Jónasson, formaður Félags íslenskra bókaútgefenda, minntist á hin fjölmörgu tækifæri sem kynning Sögueyjunnar hefur skapað. „Nýjar kringumstæður hafa skapast með tilliti til alþjóðlegrar bókaútgáfu. Við höfum fengið ótal fyrirspurnir frá útgáfufélögum um heim allan á meðan á Bókasýningunni hefur staðið.“
Kristín Steinsdóttir, rithöfundur og formaður Rithöfundasambands Íslands, var einnig ánægð með möguleikana sem nú standa til boða. „Heiðursþátttakan hefur opnað gátt út í heim fyrir íslenska rithöfunda.“
Næstkomandi sunnudag fer fram afhending heiðurskeflisins til næsta heiðursgests sýningarinnar, Nýja Sjáland, og bindur þar með enda á heiðursár Íslands í Frankfurt. En eins og aðstoðarverkefnisstjóri Sögueyjunnar benti á, þá er verkinu hvergi nærri lokið. „Sögueyjan Ísland mun halda vinnu sinni áfram að Bókasýningunni lokinni.“
Gluggaútstillingarsamkeppni
Á blaðamannafundinum voru að auki sigurvegarar í gluggaútstillingarsamkeppni Bókasýningarinnar og Sögueyjunnar kynntir. Um 700 bókabúðir – fleiri en nokkru sinni fyrr – tóku þátt í samkeppninni. Frumlegasta gluggaútstillingin, með Ísland sem þema, var verðlaunuð með tveggja vikna ferð til Íslands í boði Katla travel. Annað sætið fær þekktan íslenskan rithöfund til að lesa upp í verslun sinni og þriðja sætið fékk inneign, að andvirði 250 evra, fyrir fatnaði frá Cintamani.
Verðlaunahafarnir voru eftirfarandi:
1. Sæti: Bindernagel bókabúðin í Friedberg, Hessen.
2. Witthuhn bókabúðin í Uttenreuth, Bæjaralandi.
3. Athesia bókabúðin í Traunstein, Bæjaralandi.