Bókasýningin hálfnuð

14. október, 2011

Nú er Bókasýningin hálfnuð og hefur umfjöllun þýskra fjölmiðla um heiðursþátttöku Íslands verið mikil og einkar jákvæð. „Sjaldan hefur nokkurt land náð jafnmiklum árangri á Bókasýningunni í Frankfurt,“ segir þýska dagblaðið Süddeutsche Zeitung um þátttöku Íslands á þessari stærstu bókakaupstefnu heims.

Íslenski skálinn hefur vakið gríðarmikla athygli, en aðsóknin að honum hefur farið fram úr björtustu vonum. „Í íslenska skálanum sýnir eyjan í norðursjó sína bestu hliðar ... Engin önnur gestaþjóð hefur verið jafn notaleg,“ var sagt í þýska ríkisútvarpinu. „Heiðursgesturinn Ísland hefur skapað griðastað í miðjum erli messunnar,“ segir í dagblaðinu Die Welt. „Þeir sem sækjast eftir hvíld eða afdrepi, þar sem manneskjur og bækur mætast, ættu að fara til Frankfurt ... Í nánast heilagri byggingu sem hvetur til íhugunar er maður leiddur á milli risavaxinna tjalda þar sem gefur að líta lesendur á öllum aldri – lesandi fyrir framan heimilisbókasöfn sín, einbeittir, niðursokknir og hugfangnir.

Dagskrá skálans hefur verið þéttsetin áhugafólki um íslenskar bókmenntir og menningu. Fimmtudaginn 13. október undirritaði Jón Gnarr, Borgarstjóri Reykjavíkur á sviði skálans samning við ICORN, alþjóðleg samtök skjólborga rithöfunda, um inngöngu Reykjavíkur í samtökin. Útnefning Reykjavíkur sem bókmenntaborg UNESCO var þar um leið kynnt. Sömuleiðis vakti blaðamannafundur Sögueyjunnar og AmazonCrossing mikla athygli.

Á höfundarkynningu Arnalds Indriðasonar, sem fram fór fyrr í dag, dugði stólafjöldinn ekki til, og máttu margir sætta sig við sæti á gólfinu. Að kynningu lokinni þyrptust aðdáendur bóka hans að honum, og sóttust eftir áritunum, en sjaldgæft er að þessi þekktasti rithöfundur Íslendinga gefi þannig færi á sér.

Framundan eru fleiri höfundakynningar, svo sem Auðar Jónsdóttur, Eiríks Arnars Norðdahl, Steinars Braga og Hallfríðar Ólafsdóttur, en lokablaðamannafundur Sögueyjunnar fer fram laugardaginn 15. október.