Frá torfi til steypu – íslensk byggingarlist í Frankfurt

29. september, 2011

Þrítugasta september opnar í Deutsches Architekturmuseum sýning þar sem íslensk byggingarlist, allt frá landnámi og fram á okkar daga, verður í brennidepli. Yfirskrift hennar er „Island und Arkitektur?“ og stendur hún yfir til 13. nóvember. Sýningin er á meðal fjölmargra viðburða sem haldnir verða í Þýskalandi vegna heiðursþátttöku Íslands á Bókasýningunni í Frankfurt.

Á „Island und Architektur?“ verður leitað svara við mikilvægum spurningum er snúa að fortíð og framtíð íslenskrar byggingarlistar. Hvernig birtist góðærið alræmda í húsum Íslands? Eða þá kreppan sem á eftir fylgdi? Hvernig hús byggði þjóð sem átti ekki greiðan aðgang að timbri og öðrum algengum byggingarefnum?

Rómaðar húsaljósmyndir Guðmundar Ingólfssonar leika stórt hlutverk í sýningunni. Jafnframt verður heimildarmynd Henry Bateman „Future of Hope“ sýnd þar, en í henni er fjallað um sjálfbærni á Íslandi – endurnýjanlega orkugjafa, nýsköpun og frumkvöðlamennsku – eftir hrun.

^{Ljósmynd: Guðmundur Ingólfsson}