Blaðamannafundur í Frankfurt

7. júní, 2011

„Hungrið eftir góðum sögum á sér djúpar rætur í okkur mannfólkinu. Það er varla til betra dæmi um það heldur en Ísland, því Íslendingar lifa í sögum sínum. Þýska þjóðin deilir augljóslega þessari löngun með Íslendingum, sem fjöldi nýútgefinna bóka ber vott um,“ sagði Jürgen Boos forstjóri Bókasýningarinnar í Frankfurt á blaðamannafundi sem fram fór þar í borg mánudaginn 6. júní, þar sem menningardagskrá Sögueyjunnar Íslands á bókasýningunni 2011 var kynnt. Viðstödd fundinn voru Vigdís Finnbogadóttir, fyrrverandi forseti Íslands, og rithöfundurinn Þorsteinn frá Hamri.

Frá haustinu 2010 til haustsins 2011 má gera ráð fyrir að útgefnar þýðingar, ásamt bókum tengdum Íslandi, verði hátt í tvö hundruð á Þýskalandsmarkaði, vegna heiðursþátttöku Íslands á Bókasýningunni í Frankfurt. Um 30 rithöfundar eru væntanlegir til borgarinnar næsta haust, má þar nefna Yrsu Sigurðardóttur, Gyrði Elíasson, Guðrúnu Evu Mínervudóttur, Jón Kalman Stefánsson, Hallgrím Helgason, Kristínu Steinsdóttur og Sjón.

„Komdu með til Frankfurt“, verkefni Sögueyjunnar um íslensku heimilisbókasöfnin,þar sem gestkomandi á bókasýningunni fá tækifæri til að líta inn á íslensk heimili og virða fyrir sér bókakost þeirra, var að auki kynnt fyrir þýskum blaðamönnum. „Flest íslensk heimili hafa að geyma sín eigin litlu bókasöfn. Það væri ekki unnt að halda sjálfstæðum útgáfuiðnaði um 30 bókaútgefenda á lífi hjá svo fámennri þjóð ef þessi mikli bókmenntaáhugi Íslendinga væri ekki fyrir hendi,“ sagði Halldór Guðmundsson, verkefnisstjóri Sögueyjunnar. „Með þessu verkefni færum við íslenska lesendur og þessa hefð íslenska heimilisbókasafnsins til Frankfurt og bjóðum fólki, í tvöfaldri merkingu, að líta inn í bókmenntaveröld okkar.“ 

Yfirgripsmikil dagskrá listviðburða í Frankfurt í tengslum við Sögueyjuna var einnig kynnt. Meðal listsýninga má nefna myndlistarsýningu Gabríelu Friðriksdóttur, Crepusculum, sem sýnd verður ásamt íslenskum handritum í Schirn Kunsthalle í Franfurt í lok september.Einnig er væntanleg fyrsta stóra einkasýning Ragnars Kjartanssonar í Þýskalandi og verður hún sýnd á vegum Frankfurter Kunstverein í haust. Íslensk byggingarlist verður að auki kynnt en Byggingarlistasafn Frankfurt undirbýr um þessar mundir yfirlitssýningu um byggingarlistasögu Íslands. Íslensk tónlist kemur einnig við sögu, en meðal þeirra tónleika sem haldnir verða vegna heiðursþátttökunnar má nefna tónleika Mótettukórs Hallgrímskirkju í dómkirkjunni í Frankfurt og svo mun raftónlistarmaðurinn Valgeir Sigurðsson stíga á stokk í menningarmiðstöðinni Mousonturm í Frankfurt.

Fjöldi upplestra víða um Þýskaland verður á dagskrá í kjölfar blaðamannafundarins og þann 8. júní verður haldinn dagur íslenskrar ljóðlistar í ellefu bókmenntahúsum í Þýskalandi, Austurríki og í Sviss með fjölbreyttri dagskrá þar sem íslensk skáld munu lesa upp úr verkum sínum.

Ljósmyndir frá blaðamannafundinum má nálgast hér.

^{Ljósmynd: Frankfurter Buchmesse / Fernando Baptista.}