Morgunþula í stráum
„Ég er viss um að ég gæti skrifað eina bók á ári, ef ég gæti ráðið mér hjálparmann til að skrifa á tölvuna,“ segir Thor Vilhjálmsson. Skáldsaga hans Morgunþula í stráum kemur út í nýrri þýskri þýðingu með haustinu. Thor segist vera afar ánægður með það, „það var kannski löngu tímabært,“ bætir hann við og brosir.
Skáldsagan Morgunþula í stráum kom út árið 1998 og hlaut Íslensku bókmenntaverðlaunin það ár. Í henni segir frá Sturlu Sighvatssyni sem var einn mestur höfðingja á Íslandi á Sturlungaöld. „Þetta er aðgengilegur texti sem ber bestu höfundareinkennum Thors Vilhjálmssonar glöggt vitni; stílgáfa hans og ljóðræn myndvísi haldast hér vel í hendur við spennandi sagnaþræði ofna úr fornum sögum, minningum og vitund Íslendinga,“ sagði bókmenntafræðingurinn Soffía Auður Birgisdóttur í ritdómi um bókina í desember 1998.
Thor er sjálfur langt frá því að vera sestur í helgan stein. Öðru nær. Hann skrifar fram á nætur þessa dagana, er með nýja bók í smíðum, en gefur ekki upp hvort það sé prósi eða ljóð, kannski hvorutveggja.
- Hvenær kemur þessi nýja bók út?
„Þegar ég er búinn að skrifa hana.“
- Og hvenær verður þú búinn að skrifa hana?
„Ég veit það ekki, fyrr en ég er búinn.“
Hann hugsar sig síðan um stundarkorn: „Ég gef mér bara þann tíma sem þarf. Þetta gengur vel. Ég var á gömlum slóðum í París um daginn og það gerði mér gott. Það hjálpaði til. Ég get sagt að það er góður byr við að skrifa núna. Þegar ég var háseti á Lagarfossi voru tólf farþegar um borð ef ég man rétt. Ég stóð við stýrið og þurfti að passa mig alveg sérstaklega að halda skipinu stöðugu meðan farþegarnir borðuðu súpuna.“
- Og þannig er þetta þá núna, þú þarft að stýra vel, þegar þú skrifar nýja bók?
„Já, og vanda mig við þetta, sem manni er trúað fyrir. Það hefur ekki tekist að stöðva mig hingað til og ég hef aldrei beygt mig fyrir neinum,“ segir Thor að lokum.
Myndskeið með viðtali við Thor Vilhjálmsson um Morgunþulu í stráum og skáldskapinn, verður birt á Sagenhaftes Island innan skamms.