Sögueyjan Ísland á Facebook
Kveðja frá Nóbelsskáldi ýtir síðunni úr vör.
Sögueyjan Ísland hefur tekið í notkun Facebook-síðu, og er slóðin www.facebook.com/sogueyjan.island. Þar munu birtast ýmsar upplýsingar um viðburði á döfinni í menningardagskrá Íslands í Þýskalandi árið 2011 í tengslum við heiðursþátttökuna á Bókasýningunni í Frankfurt í október.
Ein fyrsta tilkynningin sem birtist á síðunni var kærkomin kveðja til Sögueyjunnar frá Nóbelsskáldinu J.M. Coetzee, en hann var gestur Bókmenntahátíðar í Reykjavík árið 2007 og hefur sterkar taugar til íslenskra bókmennta:
„Einhver merkilegasti þátturinn í fari Íslendinga er sú tryggð sem þeir halda við bókina. Ævaforn bókmenntahefð þeirra er jafn ljóslifandi fyrir þeim og ef hún hefði verið skrifuð í gær, en um leið eru þeir meðvitaðir um alla nýja strauma í bókmenntum, og lesa af ákafa á mörgum tungumálum.
Kær kveðja,
John Coetzee.“