Besta glæpasaga ársins í Frakklandi
Franska bókmenntatímaritið Lire hefur útnefnt Skipið eftir Stefán Mána sem bestu glæpasögu ársins þar í landi í nýjasta hefti sínu.
Franska bókmenntatímaritið Lire hefur útnefnt Skipið eftir Stefán Mána, eða Noir Océan eins og hún hefur verið titluð í franskri þýðingu Eric Boury, sem bestu glæpasögu ársins þar í landi í nýjasta hefti sínu.
Gagnrýnandi Lire gefur bókinni fullt hús og hampar henni sem meistaralega unnu þrekvirki sem viðheldur stöðugri spennu og sleppi ekki takinu af lesandanum þar til yfir lýkur. Í dómnum segir ennfremur að texti Stefáns Mána einkennist af hamslausri reiði, en verkið sé um leið harmrænt og skáldlegt.
Skipið er fyrsta bók Stefáns á Frakklandsmarkaði. Þýðingin kom út snemma á þessu ári en sala bókarinnar hefur tekið kipp eftir þær frábæru viðtökur sem hún hefur fengið hjá frönskum gagnrýnendum og er annað upplag væntanlegt í bókabúðir þar í landi. Bókaforlagið Gallimard, sem gefur Skipið út, hefur tryggt sér útgáfuréttinn að fyrra verki Stefáns, Svartur á leik (2004), og hefur lýst yfir áhuga á næstu bókum hans.
Skipið hefur þegar komið út í Þýskalandi, Svíþjóð og Danmörku og er væntanleg í Tékklandi.