Sögur af landi
„Frábær ferð og góðir ferðafélagar“ segir Bergur Ebbi Benediktsson um ljóðaslamm ferðalagið á dögunum.
Fyrsta áfanga Saga – Slam lauk í liðinni viku með upplestri á Næsta bar í Reykjavík. Þetta er viðburður sem Sagenhaftes Island verkefnið skipulagði. Þrjú þýsk ungskáld ferðuðust um Ísland að sækja sér innblástur í landið og sögu þess. Skáldin eru Nora Gomringer, Finn-Ole Heinrich og Bas Böttcher frá Þýskalandi og með þeim í för voru Íslendingarnir Bergur Ebbi Benediktsson, Ugla Egilsdóttir og Dóri DNA frá Íslandi.
Ferðin var ævintýraleg, allt frá heimsókn í Gljúfrastein, og frá Landnámssetrinu í Borgarnesi til svartnættis undir Eyjafjöllum í þann mund sem eldgosið í Eyjafjallajökli var í rénun.
Það var auðheyrt á Næsta bar að skáldin og söngvararnir voru uppnuminn eftir ferðina. Þau fluttu ljóð, sögur, söngva og rapp fyrir fullu húsi ásamt ljóðskáldunum Kristínu Svövu Tómasdóttur og Hildi Lilliendahl. Þau munu svo nota sér efniviðinn frekar í verk sín á næstunni, skrif og blogg á netinu, og halda svo áfram ferðinni með upplestrum í Þýskaland á næsta ári.
„Ferðin var mjög skemmtileg“ segir Bergur Ebbi Benediktsson. „Þótt ég hafi farið þetta allt áður þá er svo skemmtilegt að upplifa landið með nýju fólki. Við gátum útskýrt margt fyrir þeim í fornsögunum, sögðum örugglega einhverja vitleysu líka eins og gengur! Það er mjög algengt að útlendingar rugli þessu öllu saman, fornsögunum, norrænni goðafræði, álfum og huldufólki. Ég held að okkur hafi svona í sameiningu tekist að flokka þetta þokkalega vel. Við viljum öll nálgast einhvern kjarna, svona frumkraftinn í þessum sagnaarfi og vinna með hann. Við komumst ekki hjá því að skoða til dæmis ýkjurnar í stíl Íslendingasagna og hvernig það tengist þjóðrembingi og stælum í Íslendingum, sem er áberandi enn þann dag í dag.“
Saga – Slam verkefnið er samstarfsverkefni Sagenhaftes Island og Goethe-Institut í Kaupmannahöfn.