Hvetur bókaáhugamenn á Íslandi og í Þýskalandi til að gerast félagar

25. apríl, 2010

„Þetta skemmtilega verkefni hefur farið vel af stað“ segir Ólafur Davíðsson, formaður stjórnar „Sagenhaftes Island“ félagsins sem var stofnað af Íslendingum og Þjóðverjum í desember á síðasta ári. Tilgangur félagsins er að styðja við menningarverkefni í Þýskalandi í tilefni þess að Ísland verður heiðursgestur bókasýningarinnar í Frankfurt árið 2011.

„Mér hefur alltaf fundist ákaflega gaman að vinna að því að koma íslenskri menningu, bókmenntum og öðrum listum á framfæri við Þjóðverja“ segir Ólafur, sem nýverið lét af starfi sendiherra Íslands í Þýskalandi. „Þjóðverjar eru áhugasamir um Ísland og íslenskar bókmenntir. Ég er sannfærður um miðað við fyrstu viðtökur að okkur takist að fá fjölmarga til að ganga í „Sagenhaftes Island'' félagið og styðja þannig við  bakið á íslenskri menningu í Frankfurt á næsta ári.“

„Aðalmunurinn á Bókasýningunni í Frankfurt og öðrum menningarviðburðum í Þýskalandi er sá, að hún fær miklu meiri athygli í fjölmiðlum. Það land sem er heiðursgestur er kynnt sérstaklega í öllum bókabúðum um gjörvalt Þýskaland. Allir fjölmiðlar, prentmiðlar, útvarp og sjónvarp eru svo með frásagnir af þessum viðburði og þar fær heiðurslandið alltaf sérstaka umfjöllun. Bókasýningin í Frankfurt er þess vegna einstakur menningarviðburður í Þýskalandi og frábært tækifæri til að kynna íslenskar bókmenntir að fornu og nýju. Þess vegna hvet ég bókaáhugamenn á Íslandi og í Þýskalandi til að styðja við þátttöku Íslands“ segir Ólafur Davíðsson formaður stjórnar „Sagenhaftes Islands“ félagsins.

Hvernig gerist maður félagi?

Almennt félagsgjald í „Sagenhaftes Island“ er 100 evrur. Síðan er hægt að gerast stuðningsfélagi með framlagi upp á 500 evrur. Stuðningsfélaga er getið sérstaklega á heimasíðu Sagenhaftes Island. Heiðursfélagar nefnast þeir sem leggja fram 1000 evrur og þeirra verður getið sérstaklega í sýningarskála Íslands á bókasýningunni í Frankfurt 2011.

Hægt er að ganga til liðs við „Sagenhaftes Island“ félagið með því að skrá sig hér.