Horfðu á mig til Þýskalands
Þýðingarrétturinn að fimmtu glæpasögu Yrsu Sigurðardóttur keyptur af Fischer Verlag.
Réttindastofa Bjarts & Veraldar hefur gengið frá samningi við þýsku bókaútgáfuna Fischer Verlag um að gefa út Horfðu á mig eftir Yrsu Sigurðardóttur. Yrsa hefur notið töluverðar velgengni í Þýskalandi að undanförnu, en vikuritið Spiegel valdi síðustu bók hennar, Auðnin, sem eina af þremur mikilvægustu bókum vikunnar þegar hún kom út þar í landi í desember.
Í Horfðu á mig reynir lögmaðurinn Þóra Guðmundsdóttir að fá endurupptekið mál fatlaðs manns sem vistaður er á réttargeðdeild fyrir að brenna sambýli sitt til grunna með þeim afleiðingum að fimm manns létust. Inn í rannsóknina fléttast önnur mál, yfirnáttúruleg og hrollvekjandi, líkt og í fyrri verkum Yrsu, en bækur hennar hafa notið ákveðinnar sérstöðu á sviði íslenskra glæpasagna í samslætti forns þjóðsagnaarfs og nútímamorðgátna. Horfðu á mig var á meðal mest seldu bóka síðasta árs á Íslandi og hlaut jákvæðar viðtökur gagnrýnenda, sem sumir töldu vera þá bestu sem Yrsa hefur látið frá sér.
Bækur Yrsu hafa komið út á yfir þrjátíu tungumálum og hlotið góðar viðtökur gagnrýnenda og lesenda víða um lönd, allt frá Bandaríkjunum í vestri til Japans í austri. Yrsa vinnur nú að sjöttu glæpasögu sinni sem er væntanleg hjá bókaforlaginu Veröld í haust.