Íslenskum bókmenntum fagnað í Osló
Sendiráð Íslands í Osló fagnaði íslenskri tungu og bókmenntum með hátíðlegri móttöku í embættisbústaðnum í Osló þann 13. nóvember. Viðburðurinn var haldinn í samstarfi við Miðstöð íslenskra bókmennta, Miðstöð norskra bókmennta og Skapandi Ísland.
Högni Kristjánsson, sendiherra Íslands í Osló og kona hans Ásgerður Ingibjörg Magnúsdóttir buðu hátt í 100 gesti velkomna í embættisbústað Íslands í tilefni af degi íslenskrar tungu í nóvember. Guðrún Baldvinsdóttir verkefnastjóri hjá Miðstöð íslenskra bókmennta hélt erindi um íslenskar bókmenntir og rithöfunda og Margit Walsø framkvæmdastjóri NORLA fjallaði um áherslu miðstöðvarinnar í kynningu á norskum bókmenntum erlendis.
Í máli Guðrúnar og Margit lýstu þær báðar þeim sterku tengslum er eru milli Íslands og Noregs á sviði bókmennta og vilja miðstöðvanna til að styrkja enn frekar þýðingar og útgáfu bókmennta milli landanna. Heiðursgestir kvöldsins, höfundarnir Rán Fygenring og Hjörleifur Hjartarson, héldu svo stórskemmtilega kynningu um samstarf þeirra, ritferla og bækur.
Gestir móttökunnar voru fjölbreyttur hópur frá bókmennta og menningartengslaneti sendiráðsins svo sem fulltrúar forlaga, þýðenda, háskólasamfélaginu, ýmissa félaga og stofnana innan bókmenntageirans og rithöfundar. Markmiðið er að kynna íslenskar bókmenntir, tryggja ímynd Íslands sem menningar- og bókmenntaþjóð, heiðra tungumálið, byggja upp ný tengsl milli íslenskra og norskra aðila og fagna degi íslenskrar tungu.
Viðburðurinn var hluti af viku íslenskrar tungu í sendiráði Íslands í Osló og stóð sendiráðið fyrir sjö viðburðum á fjórum dögum. Í embættisbúðstaðnum gátu gestir einnig skoðað farandsýningu Myndlistarmistöðvar sem ber heitið Outside Looking In, Inside Looking Out og er samsýning reyndra og upprennandi íslenskra listamanna.
