Höfundarnir Andri Snær, Kristín og Bergur Ebbi koma fram á bókamessunni í Gautaborg í haust
Uppfært: Vegna Covid-19 verður messan ekki haldin með hefðbundnum hætti og engir höfundar utan Svíþjóðar munu taka þátt.
Bókamessan í Gautaborg í Svíþjóð verður haldin dagana 24.-27. september og líkt og undanfarin ár munu íslenskir höfundar og bókmenntir fá sinn sess á þessari stærstu og fjölsóttustu bókamessu á Norðurlöndunum.
Höfundarnir Andri Snær Magnason, Kristín Eiríksdóttir og Bergur Ebbi koma fram í mörgum og mismunandi viðburðum á aðaldagskrá hátíðarinnar og verður þeirra þátttaka kynnt betur þegar nær dregur. Þemu ársins eru stafræn menning (digital culture) og lestrarhvatning - og heiðursgestalandið í ár er Suður-Afríka.
Miðstöð íslenskra bókmennta skipuleggur þátttöku íslensku höfundanna í samstarfi við stjórnendur bókamessunnar. Jafnframt er miðstöðin með bás á messunni þar sem bækur íslenskra höfunda verða kynntar og til sölu, þar af margar í sænskum þýðingum. Íslandsstofa er samstarfsaðili um básinn og Félag íslenskra bókaútgefenda annast bóksöluna þar.
